PNTL Distritu Dili Assumi Hikas Resposabilidade Husi UNPOL

Photo by Media UNMIT

Dili – Misaun Integrada Nasoins Unidas nian iha Timor-Leste (UNMIT), Domingo (27/03) offisialmente entrega ona responsibilidade ba polisiamentu husi Polísia ONU ba Polísia Nasionál Timor-Leste (PNTL) iha serimónia ne’ebé selebra PNTL nia aniversáriu ba dala 11 iha Palásiu Governu, Dili. No hahú iha loron-Segunda 28 Marsu 2011, PNTL kaer responsabilidade ba polisiamentu iha Timor-Leste tomak, no polísia ONU (UNPOL) nia papél atu fó apoiu deit.

“Nasoins Unidas kaer responsibilidade ba polisiamentu tuir pedidu husi Governu Timor-Leste iha 2006 depoizde períodu instabilidade,” afirma Primeiru Ministru Kay Rala Xanana Gusmão iha serimonia entrega responsabilidade nee.

“Iha loron ne’e, ha’u laran-ksolok atu anunsia katak PNTL foti filafali responsabilidade importante ne’e hodi mantein lei no orden iha Timor-Leste. Ha’u fó parabéns ba Komandante Jerál Longuinhos Monteiro no membru PNTL hotu-hotu tanba susesu ne’e. Ha’u hato’o obrigadu barak ba Nasoins Unidas no komunidade internasionál ba sira-nia asisténsia hodi hametin kapasidade polisiamentu iha ami-nia nasaun.”

PNTL hahú foti filafali responsabilidade polisiamentu kuaze tinan rua liubá iha Lautém. Dezde momentu ne’ebá, PNTL foti filafali komandu iha kuaze distritu no unidade hotu-hotu no la iha aumentu taxa kriminalidade ka distúrbiu ba orden públika.

“PNTL no UNMIT serbisu hamutuk durante liu tinan haat hodi harii filafali no dezenvolve PNTL nia kapasidade atu mantein Estadu-Direitu iha Timor-Leste, ne’ebé nasaun nurak liu hotu iha Ázia,” Ameerah Haq, Reprezentante Espesiál Sekretáriu Jerál nian no xefe ONU iha Timor-Leste, hateten. “Ami sei kontinua serbisu hamutuk. Maibé, PNTL sei kaer kuda talin, no ONU sei foka hodi fornese formasaun no apoiu ba polísia Timor-Leste hodi hametin tan sira-nia kapasidade ba tempu naruk.”

“PNTL kaer filafali responsabilidade ba polisiamentu iha momentu ne’e iha vantajen tanba fó biban ba PNTL atu foti filafali ninia papél molok eleisaun tinan oin, no ho tempu adekuadu antes ONU nia misaun remata iha 2012 nia rohan,” señora Haq dehan.

ONU sei mantein prezensa polísia ho maizumenus pesoál na’in-1.280 hodi apoia PNTL to’o eleisaun hotu iha 2012, bainhira UNMIT planeia atu dada an husi Timor-Leste.

“Prezidente Ramos-Horta no ha’u serbisu hamutuk ho RESJ Ameerah Haq hodi planeia oinsá ONU nia misaun manutensaun pás iha Timor-Leste sei remata,” Xanana Gusmão hateten. “Ami-nia Komisaun Nivel Aas kona-ba Tranzisaun sei simu relatóriu regulár kona-ba PNTL nia progresu hodi garante katak ita dezenvolve nafatin servisu polísia nasionál nia kbiit liuhosi Planu Dezenvolvimentu Konjuntu. (falcao)